नातिवज्रया ‘थःम्हं थःत लुइकाबलय्’ मुक्तक दुनेया समाज {Social Representation in Natibajra’s ‘Thahmhan Thahat Luikabalay’ Muktak}

Abstract

विश्व साहित्यया इतिहासय् थें हे नेपालभाषाया सिर्जनात्मक साहित्यिक इतिहासय् दकले पुलांगु साहित्य काव्य खः । नेपालभाषाया प्राचीन साहित्य धैगु प्राचीन म्ये खः । थुकी मध्ये नं नेपालभाषाकाव्यय् मुक्तक दकले लिपांगु न्हूगुविधा खः । मुक्तक कविकथं नांजाःम्ह नातिवज्रया सफू ‘थःम्हं थःत लुइकाबलय्’ पंचायतकालय् च्वयातःगु खः । उगु ईया समाजया अवस्था बारे कुलेगु थ्व शोधलेखया तातुना खः । थ्व शोधलेखं पंचायतकालय् नेपालभाषा, थ्वया साहित्ययात राज्यस्तरं यानातःगु विभेदकारी व्यवहार व उगु ईया अवस्थाया बारे थुइकेत ग्वहालि जुइ । अध्ययनया लागि पुस्तकालय स्रोतपाखें थीथी सफू मु ंकाः मुक्तक काव्यया बारे व्याख्या विश्लेषण जूगु दु । थन मुक्तकया व्याख्या विश्लेषणयाय्त समाजपरक समालोचना पद्धतियात नालातःगु दु । नापनापं पूर्वीय काव्यशास्त्रया संरचनागत सिद्धान्तया आधारय् मुक्तकया संरचनाया बारे नं कुलातःगु दु । पंचायतकाल इलय् नेपालभाषा व थ्वया साहित्ययात राज्यस्तरं कयातःगु विभेदकारी नीतिं ब्वलंकूगु तत्कालीन समाजया किपाः न्ह्यब्वयातःगु दु । पंचायती व्यवस्थाय् नेपालभाषा, थ्वया साहित्ययात न्ह्याक्व हे क्वत्यलातःसां छन्हु पक्का नं भाषा साहित्यया ख्यः चकनीगु ई वइतिनि धैगु आशा व विश्वास थुकी प्वंकातःगु दु । तर मुक्तक धयातःगु रचना धाःसा पूर्वीय काव्यशास्त्रया सिद्धान्तकथं संरचना पाय् छि मजू । उकिं थ्व सफुतीच्वंगु मुक्तकयात कविता जक धाय् ल्वः, मुक्तक धाय् मल्वः ।