जम:मि ज्यापु

Abstract

काठमाडौं महानगरपालिका वडा नं १ य् ला:गु जमल त्वा:या पूर्वय् पासिक्व अजिमा, दक्षिणय् न्हूपुखू, पश्चिमय् पिलातुं व उत्तरय् नारांहिति दु । लिच्छविकालया जमयम्बीग्रामं विकास जुया द्रङ्ग जुल । वहे द्रङ्ग त्वा:कथं विकसित जुया: जम:त्वा जूगु खनेदु । येँय् ज्यापु जातिया बसोवास दूगु परम्परागत ३२ गू त्वा: दु । थ्व हे ३२ गू त्वा: दुने ला:गु पिलातुं त्वालय् च्वनीपिं जम:मित ख: । जम:मितय् वारे अध्ययन मजूनि । उमिगु सांस्कृतिक ज्या, द्य: व जम:मि च्वनीगु थाय् पा:गुलिं मह्त्व व सादृश्य मखन । थ्व अध्ययनया मू उद्देश्य जम:मितय्‌गु सांस्कृतिक भुमिका मालेगु व अभिलेखिकरण याय्‌गु ख: । गुकिं याना: जम:मितसें थ:गु सांस्कृतिक महत्व व सादृश्य खनी । थ्व अध्ययन जम:मितय्‌गु सांस्कृतिक खँ वारे जक जूगु दु । उकियात मा:गु सामग्री मुंकेत क्षत्रकार्य याना: जम:मितलिसे न्यनेकने जूगु दु । पुस्तकालयपाखें नं सामग्री मुंकुगु दु । जम:मित निथी दु । जम:मि ज्यापुतय्‌गु भुमिका कमलादी गणेद्य: जात्रा याय्‌गु मह्र:जा नकेगुली दइ । अथे हे जम:मि कुम्हा:तय्‌गु भुमिका जनबाहा:द्य:या जात्राबले आपालं दूगु खनेदु ।