एउटा च्यातिएको पोस्टर कवितामा अस्तित्ववाद

Abstract

एउटा च्यातिएको पोस्टर वानीरा गिरिको एउटा एउटा जिउँदो जङ्गबहादुर (२०३१) कवितासङ्ग्रहमा सङ्गृहीत गद्यकविता हो । अमूर्त, दुर्बोध एवम् जटिल भाषिक बिम्बको प्रयोगवादी नेपाली कविता लेखनपरम्परालाई यस कविताले अर्थिने मूल बाटोमा हिँडाउने जमर्को गरेको छ । जटिल जीवनको विश्लेषणमा तदनुकूल क्लिष्ट भाषिक संरचनाको आमन्त्रण गर्नेहरूमा उनी पर्दिनन् भन्ने दृष्टान्त पनि यो हो । विसङ्गत विश्वपरिवेशभित्र नेपाली जीवन र विशेषतः सीमान्तकृत नारीअस्तित्वको सग्लो शब्दचित्र यहाँ उतारिएको छ । विगतदेखि वर्तमानसम्मका मान्छेका विवशता यथावत रहनुले समयलाई गिज्याएको, मानवउन्नतिलाई लल्कारेको अनि मानवताको उचाइलाई भासमा घचेटेको ठम्याइभित्र कवयित्री गिरी विसङ्गतिविरुद्ध खनिएकी छन् । मान्छेलाई यस्तो अस्तित्वहीनतामा बाँच्न हुकुम दिने यो समय विसङ्गत छ भने त्यसैभित्र निसास्सिएर बाँच्नुपरेको मानवजीवन अस्तित्वको सङ्घर्षमा छ भन्ने मूल मर्म पहिल्याउन विसङ्गतिवादी–अस्तित्ववादी सैद्धान्तिक मान्यताहरूको निकट पुगेर यसको चिरफार गर्दा रचनाप्रति पूर्ण न्याय हुने देखिएकाले यसलाई सोही आधारमा विश्लेषण गरिएको हो ।