‘फुल्यो गुराँस’ गीतमा वक्रोक्ति (Vakrokti in the song 'Fulyo Guransa')

Abstract

‘फुल्यो गुराँस’ पानस डिजिटल प्रा. लि. काठमाडौँद्वारा प्रस्तुत गरिएको रिले दोहोरी गीत हो । यस गीतमा तीन गायक र तीन गायिकाको स्वरमा गाइएका जम्मा तीन पुञ्ज र अठार अन्तरा छन् । यस अध्ययनमा उक्त गीतमा के कस्ता वक्रताहरू प्रयोग भएका छन् भन्ने समस्याको समाधानार्थ वक्रता प्रयोगको अवस्था पत्ता लगाउने उद्देश्य निर्धारण गरिएको छ । यस गीतमा आधारित भई हालसम्म कसैले पनि वक्रोक्तिपरक अध्ययन गरेको नपाइएको हुँदा अनुसन्धानगत रिक्तता पूरा गर्न गरिएको यो अध्ययन औचित्यपूर्ण पनि छ । यस लेखमा गुगल तथा युट्युबमा पाइएको उल्लिखित गीतबाट प्राथमिक स्रोतका सामग्रीहरू र विभिन्न पुस्तक तथा पत्रपत्रिकाका लेखबाट द्वितीय स्रोतका सामग्रीहरू सङ्कलन गरी तिनको उपयोग गरिएको छ । कुन्तकद्वारा प्रतिपादन गरिएको वक्रोक्ति सिद्धान्तलाई उक्त गीतमा प्रयुक्त उदाहरणबाट पुष्टि गरिएकाले यस अध्ययनमा निगमनात्मक विधिको प्रयोग गरिएको छ भने उदाहरणहरूलाई तथ्यका रूपमा प्रस्तुत गरी तिनको विश्लेषण गरिएकाले विश्लेषणात्मक विधिको समेत उपयोग भएको छ । यस गीतमा प्रयोग भएका वर्णविन्यास वक्रता, पदपूर्वाद्र्ध वक्रता, अव्युत्पन्न वक्रता र वाक्य वक्रताकाहरूको विश्लेषण यस लेखमा गरिएको छ र उक्त वक्रताका विभिन्न भेदहरूको प्रयोग भई तिनले गीतलाई शोभातिशय तुल्याएको निष्कर्ष यहाँ निकालिएको छ ।